NUNTII LATINI
a Primo Pestiensi Universitario Radiophono emissi
Platea Musei, XCVII MHz
anno Domini MMV., mense Iunio,
septimana paenultima
Epitome nuntiorum cultus humanae atque
scientiae:
I.
Naevum lunatum in Titane inventum,
II.
Iaponienses mariforantes,
III.
Tigres in summo periculo,
IV.
De turre celeberrima,
V.
De certamine automobilium primae classis.
Et nunc singuli explanentur:
Naevum
lunatum in Titane inventum
Viri
docti Americani per photographias a sonda spatiali Cassini nominata et
gyros circa planetam Saturnum ducenti factas naevum in modum cavae lunae
formatum in superficie Titanis, satellitis planetae Saturni identificaverunt.
Explicatio causae non est, nisi divinatorica: alii de cratera ictus cuiusdam,
alii de nubibus, de lapsu montis, vel de monte modicae magnitudinis somniantur.
Iaponienses
mariforantes
Expeditio
Iaponica, quam Csikju dicunt, terebrare in Mare Magnum in altitudinem
VII kilometri sibi proposuit. Quae terebratio adhuc perfectas submarinas circa
V kilometris superat, qua re nemo est, qui sciat, quaenam mirabilia tam alti
maris caput oblatura sint. Viri doctissimi Iaponienses, sicuti in planeta
Marte, vestigia vitae investigare iuraverunt: ea phyta et animalia extremophila
quaerunt, quae inimicissimas condiciones tanebrosae altitudinis tolerantia
vivere propagarique possunt.
Tigres
in summo periculo
Tigres
intra X annos emorientur, nisi protectio eorum efficacior reddita erit. Ordo
internationalis naturae tuendae (vulgo World Wildlife Fund) moderatores
Asiae hortatus est, ut quam celerrime possent, tigribus protegendis operam
darent. Venatio occulta et loca ad vivendum parum apta effecerunt, ut numerus
tigrium iam ad VII milia redigeretur.
De
turre celeberrima
Turris
Pisarum inclinata non iam ruinam datura est. Status enim eius stabilis
remansit, postquam collegium internationale turri servandae laborem suum incohavit.
Turris ad inclinationem abhinc II annos observatam revertit, quod etiam rerum
peritis inexpectatum accidit.
De
certamine automobilium primae classis
Victor
septies omnium gentium Michael Calceifactor (vulgo Schumacher) IX.
certaminis inter automobiles ex I. classe in Indianapolei habiti campionatus
anni MMV., eius satellite, Rubente Barrichello post terga relicto palmas
domum reportavit, qua re spes ei VIII. principatus, quam fortasse ille ipse
evanescere credebat, reddita est. Ii XIV competitores, qui rotis gummeis a Michelin
fabricatis utuntur, salutis causa – ne rotae gummeae deficiant, quia non satis
solidae – desse debere coacti sunt. Calceifactor et ceteri V initium certaminis
subire audentes rotas gummeas a fabrica Pontipetra (vulgo Bridgestone)
productas praeferunt. Tiago Monteiro tertius suum cursum consummavit.
Et nunc sequantur versiculi incerti auctoris de origine podagrae,
quam, fide maius, cum Graeci tum Romani deam colebant:
Iuppiter,
ut perhibent, qui fingunt multa locuti,
nectare cum potus de mensa surgeret, ictus
offenditque pedem, ac doluit, puditque notari.
Duxerat ingentem plagam. Tunc caelicolum Rex
sanxit: ut Heroum posthac dolor omnis ad immos
deflueret talos, siquis divinus haberi
vellet et insignis: Baccho
decreta probante.
In Dis primus erat Vulcanus;
qui pede recto,
claudus adulator, nunquam fuit usus utroque
patris ad exemplum. Sed cum fera bella Gigantes
Instruerent, sursum iaculati saxa, cucurrit
nequidquam simulans, malleo post terga relicto.
Posse videbatur volitare per aera more
alitis. usque adeo velox timor addidit alas.
Finiunt
nuntii, componentibus Henrico Hargitai et Petro Kovács,
recitantibus Martino Keppel et Sebastiano Szabó.
Auditis
Primum Pestiense Universitarium Radiophonum. Platea Musei, XCVII MHz.